- حليت باب الجنان لقيت الملاح رقود تنهدت الدالية و تحرك العنقود قال القمر فالسماء نكشف على السحاب يذوب خلي الحبيب لحبيبو و اللي في قلبو حاجة الله يبلغ المقصود.
- نزلت لقاع البحر خرجت لي جنية قالت لي وشبيك يا لالا مهمومة تكلمي افتحي قلبك ليا قلت لها يا مولاتي هذاك حبيبي أداوه عليا قلبي معاه و قلبو معاها هيا .
- جاز عليا شباب في يده منديل ازرق و ششيته معنقرة و لبسته تبرق عليه نسمح في الولد وعليه نطلق وعليه نخلي البلاد ونردها خندق.
- فاطمة يا فطوم وين ما تكوني نرسلك مرسول إذا سكنتي البحر نرسلك عوامة وإذا سكنتي السماء نرسلك حمامة و إذا سكنتي القبر يحاسبك مولانا.
- أصلك أصلك و ما ينفع غير الصح مولاة النية الصافية عليها ربي يفتح أطول و لا تقصر يجيها السعد و الربح .
- التمر و الحليب في طبق وسط الخيمة نهديهم للحبيب باه يوالف ديمة ما يعزش اللي في الجيب هذاك زوجي يالميمة.
- يا لالا يا لالا يا مولاة القلب القاسي حني على حبيبك يالي طيرتي مني نعاسي ملي شفتك راني نتعذب عليك نعادي اماليا و قاع أحبابي وناسي .
- علي يا علي يالي سومك غالي من صابك تجي لعندي نفرشلك مطرح حرير و نغطيك بيزاري.
- عيطت على سيد الملاح صبت الناس رقود هزيت الدالية طاح منها عنقود النجوم قالت النجوم نحكي و قال القمر نذوب اصبر يا قلبي ياك كل شي مكتوب.
- يا قاعدة في الجنينة و القرقاف حذاك في النهار نتفكرك و في الليل نترجاك قلبي وصل لعندك و عينيا حشمو من بهاك ذاك البصر المفلق يما واش فيه راه القلب تعلق لمن نهديه لا طيور تزقزق لا مخبيه.
- رشيت عتبة الباب بالزهر والطيب وسقيت كل الاحباب بالعسل والزبيب وكي نسيت جاني جواب كنت نستناه من عند البعيد.
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.