اليك اجمل البوقالات الشعبية الجزائرية.
باسم الله بدينا وعلى النبي صلينا ومع حبابنا تلمينا في قعدة باهية و زاهية ورحمة ربي يدومها علينا:
- يا لالّتي فاطمة يالالّتي فطوم سبحان خالقك ريت النجوم في السماء حسبتهم ساقك العين تبكي عليك والقلب مشتاقك .
- بعثت لك يا شباب دموعي قرنفلة حمراء ياعدو بن عدو بدّلتني بامرأة قال لي والله يا لالة ما نبذلك بالغير محبتك في قلبي حتى يشيب الطير .
- جايز على بابنا جايز واش تشوف انا لابسة لحرير و انت لابس الصوف قالها يا لالة لباس الرجال مخلوف ارواحي ليا نلبسك لقاط و نزيدلك الشنتوف.
- امّنت بالله ، و المنام رؤية من عند الله ، حمامة بيضا جات ترفرف عليّ ، معاها حصان توقّف بين يديّ.
- لالة يالالة ياريش النعام يا اللي مربية في القطيفة والرخام ملّي شفتك وعشقتك مابقالي منام.
- قالي طبيبي بلاما يدري تداوى يا عليل ، ودايا ودوايا عند حبيب لمحبتو بخيل ، وقتاش يا عمري ترحمني وترحم دموعي لي تسيل؟؟؟
- سجدت سجدة وصليت على النبي الكريم وتمنيت ورفدت يدي ودعيت ورفعت عينيا وبكيت ياربي يا كريم حققلي كل ما في قلب يورجعلي ذاك ألي طول عمري تمنيت.
- علاش يا لالا التخمام رحمة الله واسعة و كبيرة لو كان جات بالكلام نتحدثو و نعطوك تدبيرة بصح كل شي بالمكتوب ويعيا و الخير يبان و تزول عليك الهموم و تروح الحيرة.
- يا لشمس الضوايا يا العالية في سماك لو كان صبتك مرايا و نشوف وجهي بضواك يعود ربحي و غنايا و يقسم سعدي ذاك.
- جيت ساميت البحر شفت الحوت يعوم عرفت ما عندي زهر في ذا الحظ المحموم كي غاب ضي القمر ما ردت ضي النجوم.
- أصلك أصلك و ما ينفع غير الصح مولاة النية الصافية عليها ربي يفتح أطول و لا تقصر يجيها السعد و الربح.
- يا مولاة القلب الكبير ربي يعطيك و يوسع عليك ما عندك لا ذهب و لا حرير و أنت دايما زاهية و ربي مسهلك ما دريت من حيلة ندير باش نكون مثلك.
- التمر و الحليب في طبق وسط الخيمة نهديهم للحبيب باه يوالف ديمة ما يعزش اللي في الجيب هذاك زوجي يالميمة.
- في الدار صندوق مخبي في وسطو ذهب و جوهر مرجان و روبا قظيفة قالولي اماليا لمن مخبيه قلتلهم لهذيك مولاة الشان مولاة المشية الظريفة.
- شفت الزين بعيني وبكيت عليه وندمت على الأيام اللي كنت فيها بلابيه واللي يبغيـني ربي أيخليه ليّ ويخليني ليه.
المشاركات
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.